كتب عبد الله طبيل : سقط الخوف

كتب المواطن عبد الله طبيل

خمس أشهر بالتمام، الحـرب مستمرة والبلد تدمرت وكان واضح من أول يوم مصيرنا الأسود، وكان واضح من أول شهر أننا لا نمتلك أي ورقة ضغط تكبح جماح آلة القتل والتدمير الإسرائيلية، مع أول منطقة سقطت بسهولة تامة كان يجب على حـماس الخروج من الحـرب بأي ثمن، اليوم اللي صار صار لكن ما زال بإمكان حمـاس تجنيبنا المزيد من الدماء والدمار، لا يوجد أي شيء نراهن عليه لصالحنا، لا قوة ولا احتياطي ولا عمق عربي ولا دولي ولا سخام على شو بتراهن يا سنوار!!..*

اطلع واعلن الإنسحاب وسلّم واطلع إنت وغربانك إنشاء الله لو على مدغشقر، الواحد بيكون مربّي عصفورين ولو غاب عن الدار يومين بيخاف يصيرلهم إشي، إنتوا في رقبتكم اثنين ونصف مليون إنسان وبتتعاملوا إنه روح الواحد فيهم أرخص من ورقة شجر، كل كذبكم وشعاراتكم وتضليلكم سقطت في الأيام الأولى للحـرب، وكل غروركم وهبلكم وعنجهيتكم ارتدّت على صدورنا أصابتنا في مقتل، انسحبوا من الحـرب بأي ثمن كان، فش إشي أغلى من دم الشعب ومستقبله وماضيه وحاضره، كل إشي تبخّر فعلى الأقل أوقفوا شلال الدم النازف، ويا سيدي إذا بدك تحكيلي هل ستنتهي الحـرب إذا سلمت حمـاس فبحكيلك لأ مش راح تنتهي راح تستمر حتى تحقيق أهدافها، لكن ستستمر بوتيرة أخف وطأة وبشكل أهون من هيك بكثيييير، أهون من هاض الدمار والقتل والدم السايل والجوع والتشرد أهون من كل اللي بيصير بكثييير.

اطلع من جحرك يا سنوار وغادر إنت وصحابك وانضموا لباقي الشلة في أوتيلات الخارج، أو اطلع وواجه المـوت اللي بتتمناه وخلصنا منك ومن أشكالك، بس عارفينك مش راح تطلع ولا راح تنهي الحـرب ولا هامّك أصلاً لو كل الشعب انباد بما فيهم عناصرك اللي مش ضايل منهم عدد يذكر، عارفين إنك إنت وعصابتك قررتوا الانتحار في 7 أكتوبر وسحبتوا معكوا شعب كامل نحو الموت، عارفين إنكوا بتتعاملوا معنا عارفين من منطلق حلاوة روح لأنكوا عارفين زي محنا عارفين إنه مش ضايل إلكوا أي مستقبل في هالبلد، وعارفين إنه بعد الحـرب إذا بيطلع واحد منكم يمارس الهبل والعباطة والبلطجة والزعرنة اللي كنتوا تمارسوها من قبل راح يتم إعدامه رميًا بالشباشب على إيدين الشعب، وزي ما نتنياهو معني باستمرار الحـرب لمصالح خاصة فيه وبالأحزاب تاعته فإنتو كمان معنيين باستمرارها لنفس الأسباب.