رسالتي الى سيادة الرئيس محمود عباس “ابو مازن” ….

كتب د. احمد هشام حلس
احنا ما حدا خذلنا يا سيادة الرئيس…. ولا حد خانا بالمطلق في غزة، احنا الي خذلنا حالنا، واحنا الي كانت كل تقديراتنا غلط، في كل الاتجاهات، وكل حساباتنا كانت غلط، وكل مراهناتنا كانت غلط، وكل مغامراتنا كانت غلط، احنا الي وهمنا في حالنا بزيادة، واستهنا بعدونا برضو بزيادة، احنا الي كبرنا كومنا، وخدعنا انفسنا بما امتلكنا، وافرطنا في تقدير حالنا، واستخفينا بعدونا وبقدراته وبحلفاؤه، اسهلسناه يا سيادة الرئيس، او حتى استخريناه بلغة الشارع، الشارع الي صار مأوى مئات آلاف اولاد الناس المحترمين، الشارع الي طول عمرنا نمنع اولادنا ينزلوا عليه، لحتى ما تخرب اخلاقهم، صار مسكن وملجأ كل سكان قطاع غزة، احنا يا سيادة الرئيس الي في الاخر صرنا مش شايفين حد قدامنا، احنا الي شتمناك وقلينا ادبنا عليك كتير، وصرنا في الآخر نحكي زي أتخن دولة نووية في العالم، لما صرنا مش عارفين قدر انفسنا المنطقي وحجمنا الحقيقي، بطلنا نحترم حد، لا رئيس، ولا دول جوار، ولا مواطنين ولا شعوب،، وفي الآخر شحطنا شعبنا كلو على جهنم خاوة، جريناه للهاوية بكل قسوة، احنا الي كبرنا يا سيادة الرئيس عشمنا في الآخرين بزيادة، بدنا نلبسهم خوازيق على كيفنا، بدنا نورطهم في مصايب عخاطرنا، بدنا نمشيهم زي ما بدنا برمود كنترول، بدنا نمشي دول ذات سيادة وعندها شعوبها ومصالحها زي ما بدنا احنا وعلى هوانا، الجماعة كانوا واضحين معانا من سبعين سنة، حكولنا احنا مش قد امريكا، الى هي ام اسرائيل، ما بدنا حروب وقرف، بدك تطلع الصبح تهجم على الاعداء بالطواري والكريكات، والضهر يهجم كل العالم معاك؟؟؟ انتا هيك فاهم الدنيا صح؟؟ شغلة تانية يا سيادة الرئيس، احنا الي اتعشمنا في الناس الغلط، في الجهات الكذابة والمكارة، ما قرينا تاريخهم ولا فهمنا كيف العالم مركب، للاسف وثقوا اخوتنا في تركيا وايران والسودان والصين وروسيا، وصاروا بدهم العالم كلو يمشي على كيفهم، وفي الاخر وصلوا لمرحلة بطلوا شايفين بشر قدامهم، بطلوا يحترموا حد، احتقروا الرئيس الي بينفرد الو البساط الاحمر في اكتر من 200 دولة، وبيوقف في نص الامم المتحدة يحكي عن حقوقنا… مزعوا الشعب شعبين، والوطن وطنين، والحكومة حكومتين، والحلفاء نصين، الي لعبوا فينا لعب بكل خبث ومكر وحقارة منهم، وغباء شديد ومطلق منا، وفي الاخر صرنا بدنا نعمل عمليات بطولية والكل يجري ورانا بدون اي راي او تفكير او نقاش، بدنا الآخرين يحلقوا لمصالحهم وهمومهم وشعوبهم ويعطلوا كل علاقاتهم عشان خاطرنا…. احنا غلط يا سيادة الرئيس، ولازم نعترف انو احنا غلط، ودمرنا حالنا ودمرنا قطاع غزة كله بسبب تفكيرنا الغلط، بدون اي هدف يمكن انجازه، والان كل همنا العتب واللوم على الجميع، والاستجداء والرجاء والتوسل للجميع بالتدخل للحماية والمساعدة، الحماية الي حكاها الرئيس “احمونا” وكلكم استهزأتوا بيه يومها وعملتوه مسخرة على صفحاتكم ومواقعكم… اليوم كلكم واحنا معاكم بنترجى العالم كلو يحمينا ويوقف هالظلم وهالاجرام الي بصير في حقنا، بعد كل هالضحايا وهالخسائر الهائلة، وما راح اشرح الك يا سيادة الرئيس حجم الكارثة الي احنا فيها، اكيد بتوصلك التقارير اول باول…. يا سيادة الرئيس.. هدول بيضلوا ولادك، غلطوا صحيح، لكن الظفر عمره ما بيطلع من اللحم، وبتضلك الرئيس النا كلنا، يعني ابو الجميع، لازم تتحرك بكل قوة وفي كل الاتجاهات، حتى لو ما اعطوك الفرصة او الاحترام الكافي واللازم….

الحقنا يا سيادة الرئيس، احنا ورطنا ورطة العمر، حاول تحلها من عندك

ونصيحتي لقيادة حركة حماس، انا لو مكانكم شو راح اعمل، راح اروح للرئيس محمود عباس فورا، وقدام كل الدنيا، راح اعتذر الو اعتذار صريح وواضح ومباشر عن كل ما حصل خلال ١٧ سنة فاتت، وبتمنى يقبل اعتذاري، وبعد هيك راح اسلمه كل المصيبة، وكل تفاصيلها،، المختطفين بالاسرى بالقيادة بالمال بالباقي من الاسلحة بكل اشي، تفضل يا سيادة الرئيس الحقنا، الحق غزة، الحق شعبك في غزة، شوف المناسب واعمل كل جهدك وعلاقاتك ووقف هالمصيبة، احنا اولادك وغلطنا في حقك وفي حق الناس الغلابة الي في غزة، الحقنا يا سيادة الرئيس، احنا ورطنا ورطة العمر، حاول تحلها من عندك…..
بتمنى توافق حماس وبتمنى يقبل الرئيس وبتمنى يطلع بايده يحلنا…..
من وسط هولوكوست غزة…
الدكتور احمد هشام حلس…